İnformasiya texnologiyalarının sürətlə inkişaf etdiyi, rəqəmsal platformaların ictimai rəyə təsir imkanlarının daha da genişləndiyi müasir dövrdə peşəkar jurnalistikanın rolu hər zamankından daha böyük əhəmiyyət daşıyır. Məhz belə bir vaxtda Azərbaycanın mədəniyyət paytaxtı Şuşada keçirilən IV Şuşa Qlobal Media Forumu beynəlxalq media ictimaiyyətini ortaq platformada bir araya gətirərək qlobal informasiya mühitinin gələcəyi ilə bağlı mühüm müzakirələrə ev sahibliyi edir.

Azərbaycan Prezidenti İlham Əliyevin iştirakı ilə başlayan forum dünyanın müxtəlif regionlarından media rəhbərlərini, jurnalistləri, ekspertləri və rəsmi şəxsləri bir araya gətirib. "Sülhün təşviqində medianın missiyası: Həqiqətin bərpası və etimadın yenidən qurulması" mövzusunda keçirilən tədbirdə müasir medianın üzləşdiyi çağırışlar, dezinformasiyaya qarşı mübarizə, süni intellektin informasiya sahəsinə təsiri və beynəlxalq əməkdaşlığın perspektivləri geniş şəkildə müzakirə olunur.

Forumun əsas üstünlüklərindən biri müxtəlif ölkələrdən olan media nümayəndələrinin eyni platformada fikir mübadiləsi aparması və fərqli baxışların açıq şəkildə səsləndirilməsinə imkan yaratmasıdır. Bu cür beynəlxalq dialoq jurnalistikanın inkişafına, peşəkar əməkdaşlığın güclənməsinə və informasiya mühitində qarşılıqlı etimadın formalaşmasına mühüm töhfə verir.

Prezident İlham Əliyevin forum çərçivəsində media nümayəndələrinin suallarını açıq şəkildə cavablandırması tədbirə xüsusi məzmun qazandırıb. Regional təhlükəsizlik, beynəlxalq münasibətlər, iqtisadi əməkdaşlıq, enerji təhlükəsizliyi, nəqliyyat dəhlizləri və qlobal proseslərlə bağlı səsləndirilən fikirlər iştirakçılar üçün mühüm informasiya mənbəyinə çevrilib. Bu format müxtəlif ölkələrin media nümayəndələrinin birbaşa dialoq qurmasına və aktual məsələlər barədə ətraflı məlumat əldə etməsinə şərait yaradıb.

Şuşanın belə nüfuzlu beynəlxalq tədbirlərə ev sahibliyi etməsi şəhərin beynəlxalq statusunu daha da möhkəmləndirir. Vaxtilə dağıntılarla üzləşən bu şəhərin bu gün qlobal media forumlarının keçirildiyi müasir məkana çevrilməsi Qarabağda həyata keçirilən genişmiqyaslı bərpa və quruculuq işlərinin real nəticələrinin dünya ictimaiyyətinə nümayiş etdirilməsi baxımından da xüsusi əhəmiyyət daşıyır.

Müasir dünyada informasiya artıq yalnız xəbərin ötürülməsi vasitəsi deyil, eyni zamanda ictimai rəyin formalaşmasına, dövlətlər arasında etimadın yaranmasına və beynəlxalq əməkdaşlığın inkişafına təsir edən mühüm amillərdən biridir. Buna görə də medianın məsuliyyətli fəaliyyəti, obyektiv informasiya siyasəti və peşə etikası qlobal sabitliyin vacib elementlərindən hesab olunur. Şuşa Qlobal Media Forumunda səsləndirilən fikirlər də məhz bu yanaşmanı ön plana çıxarır.

Son illər Azərbaycan beynəlxalq tədbirlərin təşkilində zəngin təcrübə qazanaraq müxtəlif sahələr üzrə dialoq platformalarının yaradılmasına mühüm töhfələr verir. Şuşada keçirilən media forumu da bu siyasətin uğurlu davamı olmaqla yanaşı, ölkənin beynəlxalq informasiya əməkdaşlığının inkişafına verdiyi önəmi nümayiş etdirir.

IV Şuşa Qlobal Media Forumu göstərir ki, müasir dövrdə həqiqətin qorunması, etibarlı informasiya məkanının formalaşdırılması və media vasitəsilə sülhün təşviqi yalnız ayrı-ayrı ölkələrin deyil, bütün beynəlxalq ictimaiyyətin ortaq məqsədinə çevrilib. Şuşadan verilən bu mesaj isə gələcək əməkdaşlıq, qarşılıqlı anlaşma və obyektiv jurnalistikanın inkişafı istiqamətində mühüm çağırış kimi qiymətləndirilə bilər.